تلاتة ف واحد!
قصيدة عن الثالوث
قالوا..
قالوا إن احنا تلاتة بنعبُد
إن دماغنا أكيد ممسوس
واحنا يا ناس عُمرنا ما هنسجد
غير لإله واحد قدوس
أما تلاتة ف واحد ديَّة
معناها إن إلهنا ثالوث
تعالى
تعالى هحكيلك حاجة بسيطة
مش مُعضلة أو حتى حويطة
شكلها صعب وهي حقيقي
سَلسة
مُريحة
واقع ملموس
الآب..
يعني المصدر والسُّلطان
يعني سيادة ف كل مكان
يعني الأب الحاني الواهب
يعني أمان واضح محسوس
الابن..
يعني الكَلمة الحيَّة الناطقة
يعني وعود الله الصادقة
يعني تجسُّد شخص الله
بصورة إلهية عجيبة وخارقة
يعني يسوع الراعي الغالي
إللي لا يمكن يقبل أبدا
يخطف من إيده حد نفوس
أما عن روحه القُدوس
مُبدع جابل أي حياة
نغمة بديعة ف كل شفاه
يعني الأزلي كُلي القدرة
يعني الحامي الشافي عظامنا
إن أعياها ونخرها السوس
اسمع
اسمع مِني وصدقني
إني مَسيحي مش نُصراني
ليا إله واحد دا إيماني
إنه الصخرة إنه الضامن
اللي ف سِتره هتفضل ديما
رائع وحبيب آمن محروس
